[課程檢討星期四X教仔心法星期五]
今篇講啲｢一雞兩味」嘅嘢－揀科。我打算同大家分享一啲我覺得｢難聽過粗口｣嘅揀科理由。
1.揀喱科唔知將來做咩好
老老實實，讀果科樣嘢唔等於做果樣嘢，喱種說法大家都應該聽到厭。君不見好多大學畢業生，即使主修英國文學仍然可以投入商界，主修哲學卻搖生一變成為Marketing officer，主修BBA偏偏走左去做中文補習老師。人地大學生研究左同一範疇三四年都可以跳出框框，更何況係你喱個學科知識九牛一毛嘅中學雞？咁快諗定第日做咩，會唔會急左d?
2.讀理科嘅話大學咩都揀得
「揀理科啦！到時你入到U揀文理商都得呀！」Lee句部份老師成日講嘅口頭禪，其實隱藏咗一個前設－你入到大學。冇錯，你本身如果冇讀理科，好多科目你真係唔揀得。但如果你真係因為咁而盲目選擇理科，好大機會你會因此名落孫山。我某位做緊老師嘅徒弟同我講，佢某位學生嘅經歷令佢耿耿於懷。佢學生初中果時全級考頭四十，文科成績﹑興趣亦一直高於理科。結果，因為另一位老師嘅｢金石良言｣，果位學生揀左理科。會考果時，由於課程相對簡單，亦有主科加持，果位學生勉強升到中六。但去到A level，果位學生幾努力都追唔上。結果，佢A level考到BCEFF(中化B﹑UE C)，no offer收場。或者，如果果位同學堅守佢嘅興趣，如果我嘅學生勸得掂佢改選，如果果位懶醒嘅老師肯用下腦先講嘢，一切都可能好唔同。
揀科一直都好簡單－讀得好嘅，中意讀嘅，揀啦！解決問題係解決你目前嘅問題，太早諗將來嘅問題，好可能會令你他日連面對問題嘅資格都冇。
圖片來源：東方日報
Search